政情：發叔缺席倒劉大會
屯門鄉事委員會執委會尋日開會討論修改規章，建議禁止原居民以太平紳士身份成為鄉委會當然執委，又新增條款建議訂明鄉委會主席最多只可以做兩屆共八年任期。雖然發叔以龍鼓灘原居民代表身份啱啱取得鄉委會入場券，不過明眼人都知道今次修章衝着佢而嚟，如果修章建議下月十四日經全體村代表大會通過，咁太平紳士喺鄉委會嘅特殊地位將從此成為歷史。若然修章具有追溯力，咁發叔就肯定無機會再做鄉委會主席。
一致通過修章
連埋發叔在內，執委會一共有廿二個成員，二十個尋日有出席。不過，身為主席嘅發叔唔知係咪知道大勢已去，索性前日起休假。據聞執委會一致通過修章，交畀下月十四日召開嘅全體村代表大會通過，只要過六十七個村代表呢一關，咁太平紳士喺鄉委會嘅特殊地位，將從此成為歷史。不過，尋日無討論追溯力問題，事關若然有追溯力，以發叔連任多年屯門鄉委會主席，肯定無機會再做喇。
盛傳有意角逐屯門鄉委會主席嘅現任副主席曾展雄尋日話，今次修章唔係針對任何人，純粹想增強鄉委會代表性；又話未諗會唔會選主席，等做到執委先算喎。