政情：張建宗做騷勁慳皮
新春將至，忙於籌備過年嘅市民都感受到物價過高，基層家庭更加難過年。政府高官呢輪排住隊落區做騷，勞工及福利局局長張建宗尋日去咗深水埗，同四十幾個露宿者、短期宿位人士食團年飯；雖然佢帶埋燒味加餸，但餐團年飯實在太基層。睇真啲，張建宗此行更似宣傳露宿者走出「以街為家」嘅訊息，騷味十足。
落區食團年飯
政府高官呢輪排住隊落區送暖做騷，先有煲呔曾走去同啲義工一齊包裝福袋，然後派畀弱勢社群；後有保安局局長李少光探訪老人家，尋日輪到張建宗接棒，原來佢已經係第二年帶埋燒味落區食團年飯，見飯枱上只得四、五碟餸，除咗燒味外，只得蒸肉餅、蒸鯇魚同烚菜，呢幾款菜式真係夠晒基層。
不過，張建宗擺到明醉翁之意不在酒，因為佢順道參觀咗短期宿舍，又同啲以前露宿街頭、依家搬咗去短期宿舍嘅市民傾吓偈，藉此宣傳佢哋喺社工協助下走出「以街為家」嘅經歷。做騷雖然係主菜，但高官見到基層生活咁困頓，好應該拿拿聲度橋解決喇！