港府早前委託港大社會工作及社會行政學教授葉兆輝，研究香港八十後問題，發現大部分八十後都唔信高官講嘢，部分仲認定只有透過激進抗爭，先可以令政府聽到佢哋嘅聲音。不過，政務司司長唐英年卻懶理有關研究，公開嚴斥八十後「剛愎自用」、「閂埋門做皇帝」，好易「車毀人亡」。葉兆輝其後反轟唐唐先係「閂埋門做皇帝」，同八十後完全脫節。
葉兆輝尋日又上電台寸政府，借寫家書畀囡囡，批評香港貧富懸殊不斷惡化，房屋政策同民意背道而馳等，仲話見到鄰近地方不斷發展，香港卻原地踏步，令人唏噓。
唐唐早前論及八十後時，借用美國眾議員槍擊案批評香港八十後，葉兆輝就引番○七年同樣喺美國發生嘅維珍尼亞理工大學校園槍擊案，指校方事後除咗為卅二名受害學生舉辦悼念活動，連槍手韓裔學生趙承熙都在悼念之列，對佢生前嘅鬱結同不幸表同情；仲話大家「只有祝福，沒有咒詛」，暗寸詛咒香港八十後「車毀人亡」嘅唐唐。
不過，呢位身為六十後嘅八十後專家，同年輕人溝通亦有失手之時，自爆佢個九十後細仔至今唔肯add佢做facebook朋友，仲叫家姐出手勸吓個細佬，八、九十後問題果然唔易處理。