政情：莎姐方剛分途送禮
春節快到，各大政黨馬不停蹄落區送暖，自由黨副主席方剛同周梁淑怡尋日分途出擊，齊齊落區派禮物。方剛本身係批發及零售界立法會議員，尋日選咗旺角西洋菜街、灣仔太源街同銅鑼灣渣甸坊三個出晒名嘅購物區派揮春畀啲檔主。
派揮春贈棉被
方剛今年已經連續第三年落區派揮春，今年會派五千張，每張成本一蚊計，閒閒哋要派五千幾蚊。佢話最緊要係啲檔主開開心心，其他無計。由於係周末下午，三個地方都人山人海，檔主反應都唔錯。方剛係名副其實嘅富公子，問佢會唔會唔習慣，佢不假思索話：「唔會！愈多人愈好添。」
莎姐尋日山長水遠去到石澳村向長者派棉被，因為時間比較短，所以只係派咗幾十張。點解莎姐去咁遠？無他嘅，之唔係撐自由黨嘅疑似區議員候選人王錦泉囉。莎姐已經連續兩個禮拜走去支持自由黨嘅新星，上星期上咗山頂，唔知佢會唔會落自己以前嘅地頭新界西呢？