政情：高官流年衰運纏身

農曆二、九月必有大事 !?

楊師傅話，兔年立春八字最大特色係年、月、日三柱午未空亡，「午」係日主庚金嘅官星，「未」係日主庚金嘅印星，顯示了官星虛浮，印星無力，寓意做官無力，靠山不穩。至於八字包含三金、三木、一水、一火，金木反剋造成比劫爭財局面，鬥爭性強，運程反覆。至於「火」代表官煞，身處高職嘅人以權謀私，暗地裏發財，貪污問題愈趨嚴重。

立春八字欠「土」，亦暗喻木旺火塞，生土無力，欠土影響房地產，樓市會漸向平淡，下半年更急轉直下，「土」虛更寓意山泥傾瀉及航空意外比較多。楊師傅預計，農曆辛卯二月及戊戌九月必有大事發生，特別係戊戌九月嘅「火」「土」特別旺盛，加上立春八字個「木」燒旺九月個「火」，命格忌火土嘅人實出事，咁啱好多高官同議員都係忌火土。

究竟邊個高官會行衰運呢？楊師傅算過三司十二局大部分官員，發現就嚟年滿六十歲、生肖屬兔嘅財爺鬍鬚曾及年屆六十四生肖屬猴嘅教育局局長孫明揚運程最差，其中鬍鬚曾喺農曆二月即使有良謀亦收效不大，去到農曆九月更加衰到貼地，容易出錯，講多錯多，仲要小心身體健康。至於孫公，兔年政途無乜突破，要注意心血管及眼疾之患，但佢喺九月就行大運。

兔年運程反覆嘅官員都有幾位，包括政務司司長唐英年、政制及內地事務局局長林瑞麟及林鄭月娥，其中唐唐兔年行「七煞」運，運程出現兩個極端，雖然農曆二月有一番傑作，但七月會有大衝擊，忙中略有枝節，有小人及大是非發生，九月更吃力不討好。至於行政會議召集人梁振英喺上半年順利，但農曆九月卻有志難伸，開口嗑着脷，十一月運程反覆易出錯。今年下半年特首選舉應該進入白熱化階段，如果楊師傅嘅批算靈驗，佢哋兩人嘅選情都唔慌好得去邊！

講番楊師傅所講嘅農曆二月及九月呢兩個最不利月份，正遇上財政預算案及施政報告前後，莫非暗示呢兩項大事會連累一眾官員？不過，正如尋日我哋所講，港府管治威信江河日下，步入夕陽政府末途，誠信破產，做嗰樣衰嗰樣；即使官員本身行運都無好日子過，睇嚟廣大市民都要自求多福喇。