中環出更：百仁基金年宵檔撐傷健創業
卓妮尋日去荃灣沙咀道年宵市場行花巿，撞正百仁基金主席施榮忻（Jaime）同太太（Jaymee），卓妮埋去打招呼，先發現副主席楊華勇、廖創興銀行後人廖偉麟、百樂集團太子女羅穎怡（Wendy）都喺度，不過佢哋唔係嚟做施氏伉儷嘅電燈膽，而係約埋嚟撐「百仁傷健齊創業」計劃。
百仁基金資助一班傷健人士喺度開檔，租咗兩個單位打通畀佢哋做生意，取名「百花兔現」，大會搵咗08奧馬香港代表葉少康同其他導師事前同佢哋做營銷培訓，加埋十位青年大使幫手做指導，一齊學習銷售技巧。咁有意義嘅活動，難怪Jaime同成班會員一齊嚟打氣。
今次係百仁基金第一次投攤位做善事，除咗等傷健人士同市民接觸，年輕人亦有機會落手落腳做生意；如果今次頭炮成功，Jaime話下年都會繼續搞。佢仲同太太用咗最實際嘅方法支持——開單，買咗一大堆吹氣玩具返屋企畀兩個女玩。
施榮忻掃貨氹囡囡
Jaime話兩個女雖然差幾年，不過大女對妹妹愛錫有加，仲話希望妹妹快啲長大，等大家可以一齊玩添。大女咁懂事，難怪Jaime買玩具無手軟，對兩個女一視同仁，全部禮物都買兩套。
今個農曆新年，施家浩浩蕩蕩拉隊到泰國避寒。不過廿幾日前仲為自己多年無病過而洋洋自得嘅Jaime，翌日中招患上大感冒，病到依家未斷尾，佢希望快啲好番，到時玩都玩得暢快啲。
講開去旅行，羅穎怡都會去新加坡，因為佢哋有新嘅購物商場開幕，佢當然要過去助陣。楊華勇就同廖偉麟留港消費，工作狂嘅楊華勇初五開工，月中又要上湖北開政協會，所以趁新年好好陪屋企人補數。
同「百花兔現」做鄰居嘅民健聯，尋日又係開檔日。民記主席譚耀宗嘅新年願望有九個字，就係「抗通脹、拓經濟、保民生」。蔣麗芸就希望大家身體好、經濟好。今晚同兄弟姊妹一齊陪爸爸團年嘅蔣麗芸話，團年飯由佢哋幾兄弟姊妹輪流煮，今年輪到五妹蔣麗苓下廚，佢都好期待。佢哋班孝順仔女仲為爸爸安排咗新春之旅，等爸爸去東南亞避寒；不過佢就行唔開，只可以去內地短遊。
卓妮