政情：劉鳴煒又有新公職
早前傳出婚變嘅華人置業副主席劉鳴煒，尋日又有新公職。繼去年獲政府委任為中央政策組非全職顧問及關愛基金成員後，尋日又接到新任命，出任「健康與醫療發展諮詢委員會」成員。呢個係食物及衞生局下面一個重要委員會，負責就醫療改革及公私營合作等棘手問題向政府出謀獻策，尋日一口氣加入共十三位非官方成員，劉鳴煒榜上有名。
委任名單中，大部分係醫學界猛人，包括醫學會前會長謝鴻興、醫學專科學院主席梁憲孫、中大護理學院院長李子芬外，仲有熱衷搞私家醫院生意嘅前行政會議成員陳智思等。身為富豪二代嘅劉鳴煒以前冇任何醫學背景，今次仍然獲得委任，可見政府對佢嘅器重。劉鳴煒去年十月一改低調作風，發起「香港精神大使」運動，宣揚逆境自強精神，之後更陸續出任公職，去年底更出任華人置業副主席，接班味道甚濃。
劉鳴煒去年十二月傳出與妻子分居，正辦理離婚手續，佢一直未有就婚變回應，今次願「接招」，膊頭孭多一項公職，睇嚟佢已經收拾心情，專心發展事業。