政情：工聯出書鞭撻政府
工聯會研究部編著嘅新書《勞苦工高》尋日舉行新書發布會，理事長吳秋北、副會長林淑儀同陳有海等幾位工聯會高層都有現身，連勞工及福利局局長張建宗同中聯辦官員都去撐場。呢套書仲搵咗中聯辦主任彭清華、煲呔曾、立法會主席及行會召集人梁振英等政界名人寫序添，到底套書有咩咁架勢呢？
吳秋北同我哋講，今次所以咁隆重其事，皆因係工聯會第一次出版研究報告型嘅書籍，工聯會喺籌備過程中花咗好多心血，亦有邀請學者畀意見，所以絕對係用心之作，仲希望藉此鞭撻政府走多兩步，多啲關心勞工嘅需要。
愛樓上書店打書釘
其實吳秋北好有書卷味，一睇就知道係鍾意睇書嘅人。果然佢讀書時期已經好喜歡睇書，仲不時同同學仔去啲樓上書店打書釘，最鍾意係古典小說，至愛《紅樓夢》。好可惜，佢話近年冇時間行書店，不過就仍然保持閱讀習慣，只係轉咗去睇電子書，不愧係名副其實嘅準文學博士！