政情：長毛退黨議而不決
四分五裂嘅社民連係咪藥石無靈，要視乎佢哋嘅造化啦！一直被網民指摘為牆頭草、無論現任主席陶君行同創黨主席黃毓民都唔幫嘅立法會議員長毛梁國雄，尋日企出嚟為自己解畫。不過，對於係咪退黨，佢繼續議而不決，不置可否。唔知網民收唔收貨呢？
為毓民大舊講說話
長毛尋日拍心口話，對退咗黨嘅毓民同大舊陳偉業投下百分之四百嘅信任票，堅信佢兩個唔會做犯法嘢。佢仲幫毓民解釋，話舊年公投完咗，毓民已即時畀番張四十四萬蚊支票社民連，只係「收錢嗰方無收錢」；由嗰一刻起，毓民已唔存在欠錢問題。
對於有指佢哋三人拖欠社民連永久會址基金嗰六十萬，長毛就解釋，筆錢係畀成個公投運動，協議係三子同成個黨都有責任幫手籌番，何況毓民、大舊經已退黨，更加無義務幫手籌。佢再次為毓民同大舊說好話：「分開咗仲有咩責任呀？等於養仔女一樣，離咗婚仲有咩責任養仔女？是但一個有之嘛。」
姑勿論長毛呢番話啱唔啱，阿陶就表示無特別意見，亦認同長毛所講，希望呢啲問題可以畫上句號。大家不妨睇吓長毛要拖幾耐至決定係咪退黨。