政情：Rita劉銷競爭法勢變爛頭蟀
港府管治威信江河日下，已係政壇不爭事實，原因除步入夕陽政府末途，仲有一個因素，就係港府最高層行事陰濕，口是心非，導致誠信破產。好似政改一役同申辦二○二三年亞運會，喺中、高級公務員眼中，政制及內地事務局局長林瑞麟同民政事務局局長曾德成，都係因為誤信「老闆」而被跣到攤攤腰，而下一隻中招嘅爛頭蟀，應該輪到負責推動競爭法嘅商務及經濟發展局局長劉吳惠蘭（Rita）。
林D9曾德成先後撞板
政改大戰波譎雲詭，北京喺最後一刻急轉彎，接納民主黨嘅改良方案。政改困局得以打破，禮賓府內亢奮異常，但消息透露，下亞厘畢道嘅反應卻係另一番感受，高、中級官員人人膽顫心寒，甚至人人自危，因為唔知下一隻爛頭蟀幾時輪到自己。呢場港府上下對禮賓府嘅信任危機，可以從上年政改一役講起。
大家應該仲記得，政改大戰之初，港府最高層明明公開批評民主黨嘅改良方案無法接受，情真意切，七情上面，但依家人所共知，喺表面力拒民主黨改良方案嘅同時，最後方案卻被接受，呃晒所有公務員。
申亞一役戲軌同出一轍，港府最高層拍板申亞，但一直只由德成局長做爛頭蟀擔旗推銷，碰到土頭灰臉，傷痕纍纍，煲呔曾同心戰室先至出手做騷，但當時大勢已去，最終申亞撥款觸礁，令人懷疑港府最高層根本口是心非，由頭到尾無意申亞，德成局長暗啞底被跣一鑊，都唔敢出聲。
經過政改同申亞呢件事，依家高、中級公務員對上頭信誓旦旦要推行嘅新政，已經係半信半疑，有乜重大柯打落嚟，信住一半先，甚至陽奉陰違，好似依家推銷緊嘅競爭法，相信主事局長劉吳惠蘭都係同一下場咁話。大家又睇吓係唔係！