中環出更：丁午壽玩具電車撐本土文化
工業總會前主席丁午壽（Kenneth）○八年卸下立法會議員工作後，專心搞好其開達集團玩具業務之餘，仲疊埋心水湊孫，佢囝囝丁天立同新抱何穎雯（Angie）生咗一個「好」字，大女Kirsten及細仔Gratian話咁快已分別六歲及四歲。身為爺爺嘅Kenneth童心未泯，近期靈機一觸開發可行駛嘅玩具電車，希望支持香港有價值嘅文化，仲話遲啲邀請卓妮去試玩喎！
Kenneth六八年喺美國伊利諾大學機械工程畢業後就接掌家族玩具生意，至今開發逾一千種玩具，主力發展火車模型，旗下品牌Bachmann更成為美國高銷量嘅火車模型，近年生意已逐步交由丁天立接手。現時開達位於內地嘅廠房聘請超過一萬員工，面對人民幣不斷升值，Kenneth都感到成本上漲嘅壓力，但相對港元貶值，對玩具出口帶來優勢。
逼囝囝玩椰菜娃娃
由於丁天立經常離港公幹，留低兩個仔女喺屋企，於是造就Kenneth多咗機會湊孫，等孫仔孫女無咁悶。雖然Kenneth有孫萬事足，但佢對丁天立童年嘅趣事仍然記憶猶新，仲笑笑口爆料話，丁天立細個曾經被電影《星球大戰》嘅怪獸玩具嚇到喊，佢於是要丁天立改玩當年紅極一時嘅椰菜娃娃。男仔玩椰菜娃娃？Kenneth話：「好玩咪得囉！」
農曆新年赴滬度假
Kenneth兩父子由下周年三十晚食團年飯至年初三都一齊度過，但年初四開始就各自各精彩。Kenneth兩公婆初四將啟程到上海浦西間度假屋住幾日，欣賞雪景之餘，仲會食涮羊肉及品嘗最鍾意嘅藍芝士火鍋，希望天氣唔會太凍。玩完幾日後，佢就會前往江蘇參加省政協會議。至於丁天立一家四口就選擇到日本滑雪，玩到年初十先回港，節目同樣豐富。
卓妮