自○四年起，鄉議局主席劉皇發每年大年初二都會去沙田車公廟，為香港嚟緊一年嘅運勢求籤。發叔去年為香港求得中籤，結果總算不過不失。不過發叔過去幾個月是非纏身，好多人都諗緊佢今年會唔會繼續去求。結果終於揭盅，發叔唔避忌，年初二照為大家去車公廟求番支靚籤。
猶記得○四年以前，每年求籤嘅重任都係落喺民政事務局嘅代表身上，但自從前民政局局長何志平○三年一身黑衣打扮、喺車公廟求得下籤之後，呢個重任就落咗喺發叔身上。發叔每年求籤前，仲會特登沐浴更衣以示誠心誠意，務求事事順利。
不過，發叔過去幾個月點講都唔算如意，近排運勢終於好番啲，至少順利贏出村代表選舉，仲係高票當選添。
講番發叔上次求到嘅籤，籤文講到「先難後易，凡事可許」，雖然呢支籤係為香港而求，但套用到發叔身上又幾啱使喎。莫非發叔真係可以否極泰來，今次繼續連任鄉議局主席一職？