政情：袁彌明區選湊夠一個墟
矢言要民主黨喺今年尾區議會選舉「票債票償」嘅「選民力量」，一直密鑼緊鼓準備應戰。早排打算喺區選中狙擊民主黨甘乃威嘅選民力量成員袁彌明，原來正考慮改變策略，出戰黃埔選區，狙擊民主黨黃碧雲同專業會議梁美芬。俗語有云，三個女人一個墟，如果年底區選有選舉論壇嘅話，佢哋呢場辯論肯定嘈到拆天。
選民力量今日開始喺維園擺檔賣紙扇籌款，其中有一套八把扇，將民主黨八位立法會議員變身為漫畫版八仙過海，底價五千，目標籌到五位數。選民力量嘅成員中，最出位敢言嘅前港姐袁彌明尋日話，相信年底區選相當激烈，如果要落場挑戰嘅話，極可能落腳黃埔區鬥黃碧雲同梁美芬，最好係「女人打女人」。
選民力量打算出動廿人參選，錢方面，發言人「星屑醫生」歐陽英傑話，已籌到逾十萬元，搞埋年宵同將來籌到嘅錢，應該有足夠彈藥應戰。
3D肉蒲團殺入維園
講開又講，年中上映嘅立體三級電影《3D肉蒲團》，都喺維園租咗攤檔，現場掛咗宣傳banner，到時除咗女主角到場，更會播放電影預告片，不過食環署尋晚話，因空間有限，避免人流聚集，已將禁播令通知檔主。