中環出更：邱達宏南極探秘變黑炭
工業總會行政總裁邱達宏（Dennis）最近成個人黑晒，原來佢啱啱去南極探秘返嚟。佢話極地冇黑夜，太陽喺晚上十一點落山，三點又出番嚟，日落後天空依然光亮。八日嘅旅程就咁樣暴露喺充足嘅陽光下，難怪佢成個人都黑晒。
受到氣候暖化、極地冰山加速融化影響，全球各地興起一股南極遊嘅熱潮。Dennis都唔執輸，月初同成班朋友自組旅行團，第一次去見識極地之美。佢話，南極依家係夏天，最低氣溫約零下五度，日頭氣溫可達攝氏五至十度，所以好多人去南極旅遊。
佢哋由最接近南極嘅智利南部坐飛機出發，抵南極洲半島後，再搭船深入極地。由於遊客太多，現時大船已被限登陸，要用細船或者艇仔駁遊客上岸，而大船就係佢哋嘅酒店。
空氣清新 行程悠閒
Dennis話，佢哋嘅行程好悠閒，朝早食完早餐後上岸，參觀吓唔同國家嘅科學站，睇吓懶洋洋嘅海獅、海豹，或者同可愛嘅企鵝同行。佢哋逗留期間天氣好好，浮冰唔多，加上空氣好清新，令人心曠神怡。卓妮聽佢講到咁開心，都心思思想去睇吓！
卓妮