政情：克勤仔唔認縱容親信
市民想入立法會大樓內影相，要事先申請，而且，通常要同立法會事務有關先至獲批。facebook最近出現群組，貼咗民建聯陳克勤一位議員助理，着住大學畢業袍企喺立法會大樓天台嘅照片，質疑克勤仔「縱容親信」違規。
克勤仔承認，相中人係佢嘅助理，但強調下屬無違規，指助理剛完成註冊社工課程，當日着住畢業袍去立法會同佢開會，之後喺大樓內嘅走廊同天台影相，唔認為有問題。有冇問題，最公正係問立法會秘書處，秘書處就回覆話：「根據現行安排，議員、議員助理同秘書處職員都可以去相中嘅地方。」可以去，又是否可以公然影相？仲咁招搖擺上facebook，秘書處點講都講唔清。
議員助理喺立法會大樓內，除議員休息室等少數「禁地」外，其他地方都可以自由行動，但着住畢業袍影相仲貼上facebook，恐怕唔係規則嘅問題，當事人能否尊重自己同尊重人，先至最重要。