社民連黨爭無日無之，到底邊個啱邊個錯，冇乜人睇得清楚，社民連主席陶君行日後係咪仲可以更上一層樓進身立法會，繼續係個謎。以前同阿陶喺民主黨合作過嘅立法會議員李華明（肥仔明）當頭棒喝，話阿陶弊在太心急，如果佢繼續留喺民主黨，依家就可以穩坐白鴿黨九龍東第二把交椅，肥仔明退隱江湖唔再參選，阿陶就可以冷手執個熱煎堆，穩奪九龍東議席，唔使依家兩頭唔到岸。
講番轉頭，阿陶其實係民主黨前身香港民主同盟嘅創會成員，所以資歷深厚，只不過喺大約十年前，激進嘅佢以少壯派自居，對主流派嘅種種，樣樣都睇唔過眼，當時民主黨黨鞭司徒華都好珍惜佢，對佢曉以大義，但係結果佢都係退黨收場。
肥仔明聲言下屆唔再選立法會，當年又同阿陶喺九龍東拍過檔，所以夠晒資格談論佢。佢尋日話阿陶係一個有能力嘅人，但弊在份人太心急，如果唔係，下屆立法會選舉就可以好穩陣咁有着落。不過呢個世界「有早知，冇乞兒」，呢個世界係冇如果嘅。十年太長，或者當年心中有一團火嘅阿陶，都係寧願只爭朝夕。