政情：民記設小組研競爭法
競爭法立法前路風雨飄搖，就連同港府有商有量嘅建制派都冇面畀，周時喺會議上同港府開拖。民記尋日成立咗個專責研究競爭法嘅小組，但最搞笑嘅係，小組主席竟然係連競爭法草案委員會都冇入嘅黨主席譚耀宗。
民記尋日召開首次競爭法小組會議，成員包括議員黃定光、李慧琼、陳鑑林及黨內多名律師及專業人士。譚Sir話，小組嚟緊會邀請學者、負責條例嘅黨友、商務及經濟發展局副局長蘇錦樑及各大商會嘅代表深入研究競爭法，預計至少會開五次會左右。
譚耀宗
實黨立場
譚Sir又強調，民記現時對競爭法仲未有立場，研究小組未來會將收集到嘅意見向中委會反映，再決定該黨嘅投票意向。眾所周知，民記黨團內不乏反對競爭法嘅人士，其中代表中華出入口商會嘅黃定光，更多次喺會議上炮轟蘇錦樑。
莫非譚Sir怕班黨員失控，開完會後倒戈反對競爭法，故決定做主席、親自實佢哋？