政情：扮嘢文升空 丹爺激讚
搞創意，唔係靠把口就夠，人稱「扮嘢文」嘅海洋公園主席盛智文，繼過去因應唔同嘅主題以扮殭屍、皇帝及孟婆等數不盡嘅造型出場後，又有新突破，佢尋日彈上近廿呎高空搞噱頭，為咗搞新意思，幾乎連命都唔要。
海洋公園傾力打造嘅新主題區「夢幻水都」，尋日率先畀傳媒先睹為快，開幕一刻，扮嘢文匿埋唔見人，直至司儀叫佢嗰名，一位着住七彩太空衣嘅老外忽然現身舞台前，迅即砰一聲彈上近廿呎高空，全程僅三十秒。以「一飛沖天」方式打響頭炮，可謂先聲奪人。
其實個太空飛人就係扮嘢文，只見佢背脊孭住一個噴射器，似乎係靠強力氣流推動「飛天」，就連拍武俠片常用嘅「威吔」都慳番。表演得咁成功，睇怕扮嘢文訓練有素，難怪同場嘅武打巨星兼海洋保育大使甄子丹都要豎起拇指讚賞佢。海洋公園有新搞作，扮嘢文尋日全力出動，難怪佢自己話，佢一旦接受委任做公職，就會全力瞓身落去。