政情：成員無影行會橡皮圖章

另一行會成員、鄉議局主席劉皇發早前亦因打邊爐後肚屙，一連兩次缺席行會，行會成員不時唔開會，唔怪得有人話，行會其實只係一個特大橡皮圖章啦。

據聞行會前日討論巴士公司加價申請，事關民生大事，但以代表廣大基層勞工形象入行會嘅棠哥，卻整日無現身開會，其實，棠哥之前連續兩個星期二都已經走咗堂，唔通咁快預支農曆新年假？

行會非官守成員並非全職，成員偶而請假一啲都唔出奇，好似「棉花公主」楊敏德上星期二就因為要出埠而缺席，但係一連三個星期唔見人，情況相當罕見，亦好難向納稅人交代，事關行會成員唔係義工，召集人每月收九萬九千蚊酬金，普通成員亦每月六萬二千蚊，以平均每個月有四個星期二計算，每次開會收一萬五千蚊酬金。

棠哥兩個月前受頸椎移位問題困擾，身形暴瘦，連續缺席行會，令人擔心佢病情惡化，但據悉，棠哥如常返工聯會工作，氣色良好，唔似有事。即係話，棠哥唔返行會開會，唔多似係身體情況唔許可，究竟有乜嘢重要事，令佢放下港府「內閣」嘅職責不顧？

行政會議係港府最高決策核心，理論上，開會討論嘅都關係香港政經大事，但近期行會非官守成員「走堂」情況屢見不鮮，「新界王」發叔喺今月初就一連「告假」兩個星期二，理由係之前同家人暢遊馬來西亞後患上感冒，返港走去打邊爐，事後肚屙，搞到入院休養。之前佢因為樓宇買賣唔申報涉有利益衝突，亦曾經失場唔開會。

出席率係機密！

我哋向行政會議方面查問所有行會成員嘅出席率，得到答覆係：「行政會議係機密嘅。」至於成員嘅請假，有冇一套法則規管，一樣無答案。

其實，行會成員唔止酬金開會，更加係憲制架構一部分，運作咁低透明度，真係跟唔上世界潮流，唔怪得班成員請假隨心所欲啦。