中環出更：馮載祥幫醫管局擋箭
退休一年幾嘅立法會前秘書長馮載祥（Ricky），上月開始出任醫管局成員，直情係跳咗去一個新範疇。Ricky做咗十四年立法會大管家，累積咗豐富公關經驗，醫管局捉到鹿點會嘥料唔脫角？
Ricky透露，佢喺醫管局內嘅其中一個職責，就係對外處理投訴，即係幫醫管局疏導市民怨氣同化解危機。
Ricky話，○八年卸任立法會秘書長後，抖咗一年幾，依家喺醫管局負責做處理投訴同核數工作，預期工作量都會幾辛苦，希望盡力做好佢咁話。
其實，上年十一月，醫管局宣布委任Ricky、九巴董事伍穎梅同國泰航空企業事務董事莊偉茵入局時，當時已傳醫管局想借助三人嘅公關手腕，幫手化解醫療危機，依家Ricky做咗醫管局申訴專員，睇嚟外界嘅揣測不中亦不遠矣。
不過，香港醫療系統成日爆大鑊，醫療事故不絕於耳，又點會係靠公關就可以搞得掂嘅呢？