四太：做好澳博 大家有飯食
【本報訊】賭王分產風波峰迴路轉，事件關鍵人物之一的四太梁安琪動向備受注視。她昨晚接受本報電話訪問時婉拒評論賭王連番發表聲明是否有內情，但強調自己會秉承何鴻燊宗旨和精神做好澳博，不希望澳博股價因事件下滑。以下四太答記者問。
記：何生今日講聲明，照稿讀，係咪有內情？
梁：「我都係喺電視新聞睇到咋，我唔方便答呢個問題，我同傳媒一樣注意住事態發展，總之今日澳博復番牌好開心，但對於股價跌咗落嚟，由大股東到買咗澳博股票嘅股民，都感到好遺憾。我借呢個機會講句，我會努力做好呢間公司，希望大家繼續支持，何生委派我做常務董事，我會秉承何生宗旨和精神去做嘢。」
記：「何生有無畀人逼？」
梁：「呢個我唔方便講，總之我努力做好澳博，今年澳博有人工加，好似何生咁講，要做到大家有飯食。」
記：「你會不會採取甚麼行動？」
梁：「我只係以澳博身份做事，關注事態發展，不希望股價下滑。」
記：「何生再次確認股份只係分配畀二房、三房，會否感到不公平？」
梁：「家事嘅嘢我唔答。」
記：「點解高國駿律師見完何生後聲稱仍然係何生律師身份？」
梁：「呢樣嘢係何生與高律師之間嘅問題，我唔答。」
記：「擔唔擔心外間會形容你輸咗？」
梁：「我唔會理會外間嘅講法，總之我只會答關於澳博嘅問題，家事一律唔答。」