政情：經濟動力年宵省招牌
嚟緊兩年有多個大小選舉，相信有意參選嘅政黨經已積極備戰，對於要直選嘅政黨而言，農曆新年正係同選民接觸嘅大好機會。不過，唔係主攻直選嘅經濟動力，今年一樣開番個攤檔賣精品，順便幫慈善團體籌款，睇嚟經濟動力銳意省靚自己個招牌喎！
經濟動力立法會議員林健鋒（Jeffrey）尋日同傳媒聚會，介紹佢哋將會喺年宵發售嘅暖手咕
，分別有平裝版同電熱版兩款，盛惠五十八蚊同六十八蚊，一次過買晒就一百蚊搞掂。Jeffrey話佢會喺今個月廿九日四點鐘，親身到維園做生招牌。
其實今次佢哋會幫一個成立咗一年左右、叫做「食物寧」基金嘅團體籌款。原來呢個基金專門收集五星級酒店賣唔晒嘅食物，轉贈畀有需要人士，一來減少廚餘，二來令貧苦階層受惠，至今已經有廿一間酒店支持。Jeffrey話靠政府處理廚餘就唔掂㗎啦，所以打算同食物寧長期合作，希望今年年宵有好成績。其實直選與否，政黨都唔能夠閉門造車，經濟動力肯站出來係好事，但市民接受與否就有待觀察啦！