政情：發叔贊助燈飾惹是非
「新界王」鄉議局主席兼行政會議成員劉皇發，日前成功連任屯門龍鼓灘村代表，但唔代表佢可以從此避過一切是是非非。尋日又有民調指發叔喺五大行會成員裏面民望包尾，連佢名下嘅酒樓出錢贊助區議會搞春節燈飾，都畀人質疑。
港大民意研究計劃尋日公布新一輪民調，五名知名度最高嘅行會成員當中，劉皇發以三十七點六分再次包尾，實際評分較三個月前啱啱爆出醜聞前升番些少，但距離五十分嘅合格水平仲差好遠。當然，知名度高未必係好事，低亦未必係壞事。
不過我哋尋日又收到投訴，指發叔名下一間位於大埔區嘅酒樓，附近豎起一幅超巨型春節燈飾牌，上面大字標題「大埔區議會贊助×××酒家致意」，質疑有人濫用職權同公帑宣傳私人生意。但實情並非大埔區會貼錢幫發叔宣傳，而係間酒樓畀錢贊助區會整燈飾，因此可以喺部分燈飾牌上「冠名」。我哋唔清楚投訴嘅係唔係倒劉人士，不過反映針對發叔嘅人，唔會因為村選結束而斷尾。