中環出更：郭炳江鍾情電子膠錶
講起生活品味，唔一定貴先至係好嘢，只要鍾意就係最好。好似身家數以千億計嘅新鴻基地產執行董事郭炳江，大家估吓咩名錶先至襯得起佢嘅身價？答案係價值幾百蚊嘅電子膠錶Timex。
前日卓妮喺ifc嘅一個攝影展見到郭家二少，雖然近期公務、家務忙到不得了，但佢心情好好，全程神情自若，翹埋雙手做貴賓，一副萬事都喺佢掌握之中嘅神態。卓妮見佢左手戴住一隻黑色膠錶，睇真啲，原來係Timex嘅電子錶。
隻錶有基本嘅Indiglo夜光顯示，百米防水，成隻表以黑色為主，襯上些少橙色，外觀實而不華。
多明星名人粉絲
其實Timex有百年歷史，係全美最暢銷嘅運動休閒手錶，好多明星名人都係粉絲，好似美國前總統克林頓、性感尤物莎朗史東、實力派演員羅賓威廉斯等。卓妮記得，亞洲保險總裁陳智思都係Timex嘅擁躉，依家仲多個郭炳江。