中環出更：金勞詹豪改七人車裝按摩椅
有「金勞詹」之稱嘅立法會議員詹培忠，向來喜歡以金色勞斯萊斯代步，真正做到人車合一。不過詹Sir始終嫌佢未夠舒適，兩個月前「另結新歡」，購入一部全港獨有日本豐田金色七人車。詹Sir指定豪裝內籠，包括將七人座位改裝成四人座位，又將後座變身超豪按摩椅，置身其中，簡直係皇帝式享受！
詹Sir近月開始揸「新歡」返立法會開會，雖然冇刻意介紹畀同僚，但金光四射嘅車身，一望就知係詹Sir嘅「御車」。卓妮尋日下晝路經立法會，同詹Sir撞到正，佢興奮地打開車門，展示御車嘅「食力」。
變四座位 設迷你雪櫃
訂車前，詹Sir向車廠提出特別要求，唔要七座位，四座位就夠嘞，因此內籠寬敞到極，詹Sir跳上後座，示範如何將雙腳任意伸直，鬼咁風騷。架車最大賣點，就係將後座變身按摩椅，可調校熱度，暖住背脊享受按摩樂，正到唔願落車！詹Sir又要求喺座椅旁邊加裝頭枕燈，方便睇文件；就連最細微嘅迷你雪櫃，佢都考慮埋，成套設計，直頭係元首級享受。
改得咁豪，車價要幾多？詹Sir保持神秘話：「總之好貴。」佢又大談揀車心得，話最緊要闊落舒適，揸咗勞斯萊斯多年，總覺得有不足之處，就係汽車水撥較嘈，耗油量又驚人喎。不過呢啲都係小問題，詹Sir家中部勞斯萊斯，點都唔會賣嘅。至於部新買嘅「金」色「七」人車，就令詹Sir多咗個新「朵」，睇怕以後唔應該再叫詹Sir做金勞詹，應該叫「金漆（七）詹」至啱喇！正所謂金旺財，向來賭運極旺嘅詹Sir，農曆新年將舉家遊拉斯維加斯，當然唔少得入賭場發大財喇！