政情：小恩子發雌威代老爺還擊
近年較為低調嘅前全國人大常委曾憲梓，日前開腔評論王丹申請來港出席已故支聯會主席司徒華悼念活動一事，力倡特區政府唔應該批准王丹入境，一石激起千層浪，翌日被人大書特書。事件餘波未了，竟然引發曾憲梓「星級」媳婦小恩子黎瑞恩同○八年競選立法會資訊科技界落敗嘅莫乃光喺社交網站筆戰，呢場都算係建制派同民主派就曾憲梓言論嘅場外大戰。
話說曾憲梓就王丹來港問題發完炮後，本身係香港互聯網協會主席嘅莫乃光喺facebook留言，矛頭直指年屆七十七歲嘅曾憲梓：「他朝此廢物拉柴，最好甚麼人也不准來。」仲話：「其實，將有過萬人、十萬人送華叔，此廢物只是眼紅。此廢物的確是港人少數黑心地想佢伸直的，還敢口出狂言！」譴詞造句夠晒激烈！
印象中，曾憲梓無玩facebook，不過佢新抱黎瑞恩就有玩微博嘅習慣。尋日凌晨，退出歌壇近十年嘅黎瑞恩發雌威，代老爺出頭還擊莫乃光，語氣一樣唔客氣，針針到肉。黎瑞恩喺微博話：「莫乃光作為主席，我以為都是有知識、有德行之能士，亦應該明白言論自由之可貴。」仲反問莫乃光：「用言語來詛咒一個八十歲嘅老人家是我們應樹立給下一代的榜樣嗎？」
莫乃光係IT人，喺網絡向曾憲梓發炮，一啲唔奇；但九十年代憑金曲︽一人有一個夢想︾走紅嘅黎瑞恩，○二年下嫁曾憲梓三子曾智明後退出樂壇，一直過住相夫教子嘅生活，突然代老爺出頭，捲入政治爭拗，反倒令人有啲愕然，膽識過人，怪不得曾憲梓對佢愛惜有加。
疑似道歉 話中有話
我哋打電話問莫乃光，佢話無睇過黎瑞恩嘅微博留言，強調自己唔係對曾憲梓人身攻擊。不過，隔咗一粒鐘左右，莫乃光卻喺facebook留言，話如果對曾憲梓嘅評論，引起黎瑞恩不快，謹此致歉，明顯轉咗口風：「用上一啲詞語引人誤會，是在下不當。」但佢強調無詛咒之意，「只係分析各人逝世之時嘅不同情況」；又話「堅持反對八十歲老人家反對WD（王丹）來港悼念另一位幾乎八十歲已故老人家嘅言論」，仲問番黎瑞恩點睇。莫乃光話中有話，呢個道歉唔知小恩子接唔接受呢？