中環出更：新居入伙「施」房菜宴好友

施榮忻夫婦親下廚

當晚去飲入伙酒嘅全部都係菁英會活躍成員，包括主席白富鴻、常務副主席洪為民、莊家彬（Albert）、霍啟剛、楊華勇、司庫王文博、Albert妹妹莊家蕙、林智彬、傅明憲等。適逢早前Jaime生日，加埋近日新居入伙，班兄弟姊妹就大手筆夾份送上一部Samsung六十吋大電視做生日及入伙禮物。

難得好友到訪，Jaime同太太揸車去街市買餸，提前準備好餸菜，仲親自下厨，炮製炆鮑魚、蘿蔔炆牛坑腩、福建滷麵、香煎牛扒等美食宴好友，當然仲有珍藏靚紅酒啦！Jaime話，最複雜係炆鮑魚，五日前預先將乾鮑魚浸幾日，再準備金華火腿、豬手、腩排等材料。炆鮑魚前，鮑魚同材料各以煲湯袋盛載，加入雞湯、油、紹興酒、小量糖及生抽，先用大火滾起，再以文火炆三小時以上，仲要定時切開試味，一切都係自己嚟。

Jaime另一味拿手菜式係香煎牛扒。頂級牛扒以蒜蓉、紹興酒及胡椒醃製一晚，臨煮前再加入豉油及番薯粉，放落平底鑊以猛火煎香底面，鎖緊牛扒肉汁，食落外皮脆口，內裏肉汁豐富。不過，幾味菜式之中，以福建滷麵最特別，係Jaime媽咪傳授畀佢太太Jaymee嘅獨門菜式，以福建魚蛋、仔、柳梅豬肉片、椰菜花及福建油麵煮成，大家都好高興試到Jaymee嘅手勢。

除咗鮑魚外，炆花膠都係Jaime嘅拿手好戲。講開又講，Jaime屋企收藏咗好多巴基斯坦出產嘅靚花膠，最大隻係三頭半，即一斤唔超過四隻，大部分喺三年前以金融海嘯價三千八百元一斤買入，現時每斤升值到萬多元。Jaime話，花膠含豐富骨膠原，男女啱食，相當有益，所以保值係其次，健康至係無價寶。

位於赤柱舂坎角嘅施家安樂窩達二千多呎，由設計到傢俬以至擺設，都係施榮忻嘅心血結晶。	施榮忻（右）與Jaymee抱住愛女「番薯婆婆」，笑不攏嘴。 （徐家浩攝）	施榮忻與太太Jaymee喺泰國影嘅婚紗照，甜蜜又溫馨。
福建滷麵	炆鮑魚	香煎牛扒

赴貴州開會遇龔皓

Jaime忙完搞新屋後，過去一星期又先後出席深圳市政協及貴州省政協會議，其中貴州之行最難忘，除咗帶病出席外，仲認識到親切平和嘅貴州省委書記粟戰書，期間又遇到位新委員，就係華懋慈善基金主席龔仁心嘅二仔龔皓。龔皓為香港資源非執董，又係華懋集團管理部經理，現時做埋貴州省政協，前途無可限量！

卓妮