政情：李永達感慨 年紀大機器壞

西九文化管理局行政總裁謝卓飛突然因病辭官，大家都唔多信呢個係唯一原因。尋日立法會討論西九最新進展時，一眾議員連珠炮發提出質詢，但官方繼續以私隱為由拒絕交代具體「病情」。病情未明，連議員李永達都有感而發話，上咗年紀總有啲病痛，仲話要求神拜佛，希望謝卓飛唔好三個月或者半年後突然神速好番，又申請另一份工，到時港府就真係唔慌唔尷尬囉。