政情：李國麟貪穩陣 留港過年
香港係一片福地，相對世界上好多地方，香港嘅天災真係唔算多。尋日衞生服務界議員李國麟去香港會食飯，佢話原本計劃新正頭同老婆去東歐旅行，但見嗰邊天氣又凍又唔穩定，即刻同老婆打消念頭。最近仲見澳洲昆士蘭有水災，內地又有冰雪災，難怪李國麟話始終都係留喺香港穩陣啲。
雖然話home sweet home，但放假在家唔出門，李氏夫婦都一樣無得他條，事關佢哋兩夫妻依家分別喺公開大學同中文大學任教，所以放假佢哋都要忙住備課，加上留喺香港過年，無避年理由，所以備課之餘，到時佢都會同老婆拍拖四圍去拜年。
講到年廿八、洗邋遢嘅大掃除習俗，李國麟都會跟足，不過佢就話唔使點樣特別大執大搞，事關平時佢哋屋企都好整潔，成日都有清潔家居。依家踏入流感季節，佢呼籲大家要注意個人同家居衞生，李議員果然係業界代表。