政情：捱夜寫揮春 劉健儀躁底
做政客最緊要夠氣量，難怪即使最近自由黨頻頻地震，主席劉健儀（Miriam）都係笑面迎人。不過尋日立法會開內務委員會前夕，各議員趁機會交流傾吓偈，平時夠鐘都會隻眼開隻眼閉嘅內會主席Miriam，就罕有地黑面叫議員唔好再傾偈，語氣非常躁底，唔通自由黨又有人激親佢？
Miriam事後解釋，黑面唔係因為心情差，而係最近太多嘢做，個腦有十萬樣嘢轉緊，加上年關逼近，佢要晚晚開夜車寫揮春派街坊，日日都瞓唔夠五個鐘，所以先冇乜表情喎。Miriam又澄清唔係想發同事脾氣，只係想快啲完成內會，等大家可以快啲開財委會討論申亞咁啫。
唔講唔知，自由黨好多揮春都係由Miriam即席揮毫，Miriam話起碼要寫三百份先夠數，咁點解咁多嘢做，又唔叫榮譽主席田北俊同未來副主席周梁淑怡幫吓手呢？Miriam笑笑口話，呢啲咁刻苦嘅工作，通常都係由佢做。不過佢相信田少同周太遲啲會落區寫幾張，所以想要佢哋親手寫嘅揮春，就要細心留意吓嘞！