政情：博愛落觀塘搞中醫義診
近年積極推動發展中醫藥服務嘅博愛醫院，正密謀下個月廿五至廿七日，喺觀塘康寧道遊樂場舉行一連三日嘅中醫義診，免費贈醫施藥之餘，仲會請老人家食盆菜，為推廣中醫藥搞搞新意思。
一眾博愛醫院高層同協辦機構尋日聚首傾細節，香港中藥協會創會會長兼理事長李應生、香港註冊中醫學會會長馮玖等人都在場。負責統籌是次活動嘅博愛總理彭少衍話，今次係佢哋首次舉辦「中醫中藥保健安康香港行」活動，到時博愛旗下十八部流動醫療車將全部出動義診。
由於屆時仲係新正頭，所以會請埋長者食盆菜應節，到時連續三日嘅午飯同晚飯將會同時開三十八圍，不過義診同食盆菜都要事先攞飛。有興趣嘅老人家，可以向博愛醫院或者觀塘區議員陳振彬、周耀明、潘兆文及馮錦照辦事處查詢索取事宜，到時會有象徵式收費。
博愛主席黃帆風一向喺觀塘區做唔少善事，今次喺自己地頭搞咁盞鬼嘅慈善活動，零舍開心。佢笑稱，到時活動內容仲有中藥商展覽，形式好似工展會咁，希望可以號召三、四十間中藥品牌參與。