政情：單雞羅致光掉轉槍頭
白鴿黨同政府嘅關係一向唔壞，舊年政改方案通過後更加愈行愈埋。尋日政圈兩大重頭戲都見白鴿黨核心人物坐喺官員席，佢哋就係西九管理局薪酬委員會主席
雞單仲偕，仲有關愛基金轄下嘅執行委員會主席羅致光，兩個前立法會議員不約而同掉轉槍頭為政府擋駕，上演乜嘢叫昔日嘅敵人就係今日嘅盟友。
立法會一個委員會尋日討論謝卓飛突然辭任西九文化管理局行政總裁嘅事，身為管理局主席嘅政務司司長唐英年領軍上陣，傍住佢嘅第一個人就係雞。議員問到點解管理局請人前唔驗身、點解仲要畀足謝卓飛成半個月糧時，唐唐都要搵雞代答。或者以前做過議員，雞答問題時盡量平和，用殘疾歧視條例等封住議員嘅嘴，一口一個良好僱主，等勞工界議員唔知點發難。
白鴿被指染紅
羅致光尋日亦傍住民政事務局局長曾德成出席關愛基金會議，佢負責基金執行細節，嚟緊大把機會同議員交手。佢哋都係白鴿黨核心人物，今時今日以唔同身份亮相議事廳，坐喺官員席，難怪白鴿黨畀人話被染紅。不過政圈都反白鴿勢力，今日政改本地立法嘅委員會舉行公聽會，有參加團體就打出「紅燒老鴿同鄉會」招牌，擺明與白鴿黨過唔去！