政情：葉劉以夷制夷「砌」政府
前保安局局長葉劉淑儀籌組新民黨，延攬前廉政專員羅范椒芬同前資訊科技及廣播局局長鄺其志等前高官，加盟顧問團，有人認為，前高官加盟，功能只係裝點門面，有名無實，但葉劉就另有盤算。葉劉透露，顧問團已經火速投入運作，頭炮係研究現時政府架構嘅不合理現象，即係炮轟三司十二局胡亂拼湊，違反政治倫理。葉劉話，新民黨想出謀獻策幫港府「砌」番靚個架構骨架喎，咁又係，葉劉搵前高官助拳，以夷制夷，「砌」政府，無難度啦！
政府架構龐大，運作複雜，外面嘅人難以摸透，但對喺入面出嚟嘅前高官嚟講，就駕輕就熟。葉劉話，羅范椒芬、鄺其志同新民黨執委前郵政署署長譚榮邦，已經以小組形式開過至少兩次會，研究政府架構有乜唔理想嘅地方，預計農曆新年之後，會有正式報告提交執委討論。新民黨成立只一個星期，顧問團咁快就發功做嘢，我哋唔敢質疑前高官嘅辦事效率同能耐，但呢份閃電式報告，某程度亦反映咗葉劉新黨初立，好心急搵政府開刀立威。
問題多多 分工錯亂
葉劉批評，現時三司十二局嘅布局好唔理想。佢話香港嘅房屋問題，最終關鍵始終繫於土地供應，但掌管賣地政策嘅地政總署，卻唔係隸屬運輸及房屋局，而係跟住林鄭月娥管轄嘅發展局，夠晒彆扭。又例如，劉吳惠蘭主管嘅商務及經濟發展局，統攬範疇太龐雜，而香港經濟未來出路之一嘅創意科技產業，卻無人專管；人口政策更加妾身不明，今日喺政務司司長「唐唐」唐英年愛理不理下，已慘成官僚部門嘅淒苦孤兒。喺葉劉眼中，政府架構的確問題多多，爭在無講埋最好連最高負責人都換埋。
新民黨延攬前高官加盟，呢招以夷制夷，從呢份政府架構研究可見一斑；研究雖未完成，但現時三司十二局嘅組合，係煲呔曾○七年連任時嘅傑作，佢同葉劉唔咬弦係政壇公開秘密，而林鄭同唐唐又一直係葉劉炮口下嘅高危官員，睇怕佢哋都好難避得過新民黨嘅猛烈炮火。