中環出更：胡曉明不敵假酒 攬馬桶宿一宵
潮流興品酒，近年進軍飲食界嘅專業及資深行政人員協會會長胡曉明（Herman），早前都湊熱鬧搞咗個品酒派對，提供八國美酒供賓客輪流品嘗。咪睇Herman官仔骨骨，原來極之飲得，稱得上「酒筲箕」，一次過飲五十杯以上茅台酒都面不改容。不過幾飲得嘅人都總有失手之時，佢最難忘有次喺內地應酬飲咗假酒，醉到不省人事。
品酒派對早前喺Herman有份投資嘅銅鑼灣EL CID西班牙餐廳舉行，邀請咗數十名專資會會員出席。Herman請來品酒專家即場開班教授品酒秘訣，每名會員枱上都放有八款唔同嘅佳釀，考考大家嘅味蕾。首先試嘅係氣泡葡萄酒，分別來自澳洲、新西蘭及德國佳釀，佐酒嘅前菜包括西班牙火腿配番茄多士、西班牙紅椒蝦及番茄配松露，配搭得宜。
每月聚餐 總有驚喜
再嚟係西班牙2006年Enate Rosado玫瑰紅酒，還有智利2009年Carmen Carmenere及美國2006年Napa Valley紅酒，所以主菜挑選咗鴨胸雞肉風腸西班牙海鮮飯、西班牙牛肋骨及墨魚汁扁意粉，食到賓客舔舔脷，但要試齊八款佳釀，真係少啲酒量都唔得。派對咁成功，Herman話嚟緊會再接再厲，事關會員平時各有各忙，每月嘅聚餐會，一定要畀啲驚喜大家喎！
品酒學問多，原來Herman係專家，佢自爆十幾歲就學飲酒，而且奉旨飲酒，皆因「師傅」就係佢爸爸胡法光，由啤酒、白酒、紅酒飲到拔蘭地，乜都飲過，所以練出驚人酒量，一晚飲五十幾杯茅台都唔會醉，真係唔講得笑。 不過，Herman都試過老貓燒鬚，話說十幾年前返內地傾生意，應酬時誤飲假酒，醒來睜開眼，發現自己抱住酒店房間廁所馬桶甜睡咗一晚。
卓妮