議員對申亞撥款的精彩發言
民主黨甘乃威：「市民眼睛係雪亮嘅，大家都知六十億冇可能埋單搞掂，我哋好擔心係無底深潭，開咗張無銀碼嘅支票畀政府亂填落去！」
職工盟李卓人：「點解民意本身對一個咁中立、大家都鍾意體育都咁反對？因為睇唔到你哋嘅誠意，淨係睇到你哋嘅面子！」
廠商會林大輝：「十年前（申亞）冇廣泛諮詢，揸住個口號『香港一定得』，失敗之後有無痛定思痛？有無反省、有無檢討吓當時個體育政策發展點樣？」
自由黨方剛：「特區政府申辦時候缺乏長遠眼光，冇整套構思同促進長遠體育發展方案，當大型盛事嚟諗、嚟推銷，聽到大家嘩嘩聲就縮到六十億，使市民完全失去信心。」
民建聯譚耀宗：「政府嘅準備工作仲要加強，條件係未成熟，希望能夠就算唔辦二○二三年亞運，有啲場館都早日落實，唔好申辦先去做，唔申辦就慢慢先，咁樣永遠都難申辦。」
社民連梁國雄：「運動員叫我一定反對呢樣嘢，佢要教訓你哋，佢話你想佢哋支持你嘅，就要踢波有其場、游水不浸湯、騎車無恐慌、揚帆不匆忙，四項運動你都冇場地！」
公民黨陳淑莊：「當局錯估形勢，當時啱啱辦完東亞運，港協暨奧委會表明想再下一城申辦亞運，局長當然歡迎，但經過一年嘅反思，其實香港好多體育政策做得唔好。」
民主黨張文光：「你今日輸咗比贏咗好，輸咗之後你能夠總結教訓做好體育，可能香港嘅體育先至真正有前途，申亞失敗其實係壞事變成好事。」
工聯會黃國健：「有今日咁嘅情況，政府本身要負好大責任，一方面係對民生未做好嘅反彈，第二樣係成單嘢一開始畀人唔認真、無準備嘅感覺。」