鬍鬚曾患了「派糖恐懼症」，依老朽判斷，皆因過去三年已派出逾一千一百億紓困，不但沒有為他贏得掌聲，反而被各界狂數，尤其是未能真正照顧「三無」（無交稅、無物業、無申領綜援）、「六無」（除上述三項，加埋無租住公屋、無申領高齡津貼、無學生資助）人士。
鬍鬚曾自此憎死「派糖」呢兩個字，一聽見人哋要求「派糖」，即刻面如玄檀，佢喺公開場合仲夠膽死話：用「派糖」形容紓緩措施並不合適，因為這個詞語帶有相當大的侮辱成分。請恕老朽不敢苟同，民生多艱，庫房水浸，派糖濟百姓燃眉之急，只要政府走多一步，真正關懷低下層的「六無」，那絕對是針對性地紓解民困！
鬍鬚曾明明係守財奴，卻要自我營造「理財大師」的形象，一味強調「審慎理財，應使則使」，實則年年計錯數，一味靠估，應使唔使。道理好簡單，百姓是水壺，政府係滿溢嘅水塘。今水壺很輕，得物無所用；水塘滿水卻不洩洪，一味死儲爛儲。誰令水壺變得冇用？就係死閂水喉嘅財爺囉！
鬍鬚曾嘅感性認知好有問題，派糖明明係好嘢，佢就話有侮辱成分，咁唔該你盡情咁侮辱我喇！有啲嘢唔可以睇一面，好似烏蠅，係人都討厭，唔臭穢嘅地方唔飛。但在西方之史詩，好似荷馬咁，則以蒼蠅喻戰士作戰的勇敢，因蠅群於攻取某一食物時，必聚陣而來，驅之不去，或甫去旋來，具永不言死之精神。連蒼蠅都有可愛一面，「派糖」一詞豈可輕言「侮辱」？鬍鬚曾明顯仇恨糖果，咁唔該退稅派現金！