政情：黃容根爆部門推莊
政府部門一向推莊卸責，漁農界立法會議員黃容根尋日趁立法會答問大會，質問煲呔曾點樣補償新界西北漁民因多項政府工程引致嘅經濟損失。唔問當無事，一問大件事，當眾踢爆四個部門對事件互相推莊卸責。
黃容根尋日向煲呔曾發火，指新界西北近年大興土木，港珠澳大橋、赤鱲角機場第三條跑道、研究中嘅屯門隧道，加埋海岸公園工程，全部集中喺新西沿海進行，令漁民損失慘重，但係多年嚟業界向政府追討無門。煲呔曾見根哥愈講愈㷫，於是諗住敷衍幾句打發，叫根哥搵相關局長商討，點知咁就捉蟲，語音未落，根哥再發威，話為事件搵過鄭汝樺嘅房屋及運輸局、邱騰華嘅環境局、周一嶽嘅食物及衞生局同林鄭月娥嘅發展局，連鬍鬚曾都搵過，一樣無用！搞到煲呔曾相當面懵，承諾喺港府高層「早禱會」跟進。
事件披露政府部門互相推莊又無默契，其實情況熟口熟面，同政府早前對骨灰龕政策無人理相似。