政情：宅男副局fb硬銷競爭法
商務及經濟發展局副局長蘇錦樑（Greg）因硬銷競爭法，喺議事堂被議員圍攻至遍體鱗傷，近日有網民發現，Greg蘇潛匿網上世界養傷，兼向網民埋手，喺個人facebook專頁搞「競爭法知多少？」答問遊戲，問完再自己答番，明顯想將競爭法另類包裝，直銷入宅，即係話，Greg蘇做咗競爭法「宅男」。
時下宅男，沉迷上網、打機，足不出戶，Greg蘇身為副局，薪高糧準，斷估唔敢留家曠工，但佢借網絡世界硬銷競爭法，就有愈嚟愈沉溺之態。前日下午四點幾，Greg蘇喺個人facebook專頁留言，題目叫「競爭法知多少？」以選擇題形式，每日將一條問題放上網，為博網民瀏覽，仲留言話，邊個喺十題中答對七題，就可以做大師，無非想刺激網民嘅好勝心態。其後十幾個鐘頭，有約廿個網民回應，其中好多都好聰明，無中Greg蘇嘅硬銷圈套，留言唔係答問題，反而係表態指對競爭法有保留。
欠缺新意 網民反應差
Greg蘇放上網嘅第一條問題，叫大家喺五個選項中，揀出邊項唔係競爭法嘅好處，只有四個網民回應，全部答中，Greg蘇可能見反應麻麻，喺尋日上午十一點，自己開估答番自己嘅問題，同宅男一族平日愛以虛擬身份喺交友網站自問自答，有異曲同工之妙。同時，Greg蘇再喺facebook開出第二條問題，問現時有邊個行業已經受緊競爭條款規管，據聞，宅男起居亂中有序，Greg蘇應該會喺今朝十一點開估。
港府推銷競爭法遇上極大阻力，Greg蘇被議員狂轟猛炸，喺商界又被人明批暗打，佢喺現實世界屢屢碰壁，寄情虛擬網上世界，有迹可尋，而推銷攻勢由議會轉戰民間，向facebook網民招手，更加係情理之內，只係，向議員推銷要態度誠懇，對住網民更要展示誠意，Greg蘇搞網上答問遊戲，問題欠缺新意，又無獎品，得個講字，睇怕最後又係變競爭法翻版，被人群起攻之，隨時爛尾收場。