中環出更：麥瑞琼大花筒最驚老公鬧

「一姐」話佢個個星期都要去Shopping，卓妮幾個月前先見佢晏晝偷閒去睇衫，「一姐」話佢買嘢其實好講心情，心情好自然就會去消費，佢EQ咁高，難怪成日都去「出血」，仲要唔等減價貨，睇啱就買，所以問佢花幾多錢換季，佢都唔好意思講，話驚畀老公鬧。「一姐」話佢唔止買衫，買化妝品同食物亦一樣唔手軟，不過問佢屋企仲有幾多件未剪牌嘅靚衫，佢轉數奇快咁話，自己換衫嘅速度都好快，每晚都會諗定第二日着咩衫用咩袋，所以唔會嘥，用舊咗就捐出去，絕無浪費。

水餃王后趣談普通話

水餃王后臧姑娘曾經係呢個選舉嘅得獎者，佢話呢個獎畀佢好大推動力，鼓勵好似佢咁嘅普通婦女可以憑自己闖一番天地。不過講到廣東話，臧姑娘就無咩信心，嚟咗香港咁多年都無人知佢講咩﹗最搞笑係以前香港人嘅普通話都麻麻哋，但大家遷就同佢講普通話，結果成日鬧出「睡覺幾錢晚？」（水餃幾錢碗）同「有無生痔瘡？」（有冇散紙暢）嘅笑話。