前保安局局長葉劉淑儀牽頭組成新民黨，新黨初立，身為主席嘅佢滿腹大計，我哋喺二十六日星期三立法會大會嘅書面質詢裏面，發現葉劉有獨特建議，倡議政府興建一條過海隧道，不過唔係畀車行，而係畀人行，即係叫人行路過海。
政府研究緊改善三條行車過海隧道嘅交通情況，葉劉向政府提書面質詢，指最近有市民向佢提創意方案，不如興建行人專用過海隧道，內設購物廊，由中環行路過尖沙咀，步程二十分鐘，亦可設行人輸送帶，既可環保減排，又能開拓公共空間，仲可以創造就業添，問港府有冇諗過，以及可行性幾大，即係借市民之口，逼港府考慮。
行路過維港，路程雖然無行路上廣州咁甘，但亦都唔嘢少，構思會有幾多市民賞識，成本效益有幾大，暫時真係好難講，聖經故事有摩西帶以色列人過紅海出埃及，今有葉劉帶港人行路過維港，唔知最終係咪又變成另一個神話呢？