政情：立會雙波身份亂晒龍

唔知陳健波係咪已經習慣咗被人認錯叫錯，形成「心理陰影」，尋日喺立法會，主席叫陳健波，佢挺身更正問主席係咪叫錯人，主席都畀佢搞到亂晒龍。

立法會尋日討論港府安老政策，主席叫陳茂波提出佢嘅問題時，坐喺佢身旁嘅另一「波」陳健波突然話應該係輪到佢發言至啱。

主席以為自己眼花讀錯，即時道歉，點知陳茂波又話自己都有按掣排隊發言，認為主席冇搞錯，係陳健波以為自己被叫錯至真。陳健波即時顯得有點尷尬，陳茂波仲笑言：「我哋兩個波搞亂晒你哋，真係唔好意思喇。」

「雙波」同屬五散人，喺立法會唔算高調，故不時畀人搞錯。代表會計界嘅陳茂波就曾經呻過，有市民走去徵詢佢保單嘅意見，陳健波亦話有唔少人打去問佢攞有關會計嘅資料，講咗一輪先知對方搞錯。

睇怕都係因為「雙波」畀人認錯得太多，健波今次至會對錯號，入錯座。