政情：傳陳碧鏵任無綫高層
八達通舊年因為出售客戶個人資料搞到滿城風雨，一姐陳碧鏵孭鑊請辭，八達通啱啱就委任咗前VISA國際組織香港及澳門區總經理張耀堂做新嘅CEO，事隔大半年，咁究竟前一姐去咗邊呢？
做海外發行
據聞陳碧鏵已經搵到工，佢極有可能加盟電視廣播有限公司（TVB）做海外發行，即係TVBI，職位最少係總經理，仲可能喺呢一兩日內上任添。陳碧鏵由文儀用品推銷工作晉升至電訊公司總經理，又去過VISA任高職再轉投八達通，期間大多數都係由獵頭公司挖角，所以得到TVB話事人六嬸方逸華賞識，一啲都唔奇。
消息就話，六嬸大半年前已斟陳碧鏵過檔，喺電視城更見過陳碧鏵芳蹤添，傾就傾咗好耐，只係一直只聞樓梯響咁話。消息又話，TVBI總經理個位已經懸空咗五、六年，家陣由集團總經理李寶安兼任，所以要開番呢個位，都唔係無可能。TVB外事部副總監曾醒明接受查詢時就話，直至尋日都未收到任何消息。