政情：唐唐申亞騷累特首辦fb被洗版
特首辦facebook專頁「上亞厘畢道」前日播出一段撐申亞短片，由「唐唐」唐英年拍特首辦主任譚志源，同兩位香港羽毛球新舊一姐葉姵延同陳念慈打混雙友誼賽，諗住為申亞造勢，但係兩位高官球技蹩腳，睇到人眼冤，網民都睇唔過眼。
耗公帑為自己貼金
唐唐同Raymond譚呢場「申亞倒米騷」，連累特首辦facebook被人洗版，近廿個留言幾乎清一色鬧爆，狂插唐唐同Raymond譚就
幾十萬元一個月去打波之餘，更加狠批港府用納稅人錢開facebook，原來一味為自己「讚好」、上演無聊騷。
對呢啲尖銳意見，「上亞厘畢道」管理員全部看在眼裏，但全部無回應，唯一一千零一個留言，喺前日傍晚回覆，解答網民查詢，話「今次友誼賽於禮頓山社區會堂進行」，亦係「上亞厘畢道」開張以來首次回應網民。對批評視而不見，有利宣傳就急不及待回覆，選擇性回應，唔通就係特首辦嘅facebook特色？