政情：德成局長 騎「象」難下

德成局長舊年九月出嚟宣布政府申辦亞運，事前就成立咗個二○二三年亞洲運動會臨時申辦委員會，網羅社會各界人士廣集專業意見，務求喺諮詢期內爭取到社會支持，又特別喺三個敏感範疇包括公關及推廣、場地及賽事同埋申辦計劃書成立小組，制訂專門策略。睇政府網羅呢班專業精英，個個都有專長，照計政府應該勝券在握，可惜就係德成局長抱住「意見接受、態度照舊」，一副自大狂妄嘅態度，就搞衰咗開頭。

聽聞會上有位公關廣告界重量級人物，喺德成局長宣布申辦亞運之前，模擬咗啲大方又得體嘅回應畀局長參考，主題係圍繞「申辦亞運係為未來投資」、「申辦亞運係為社會將來發展」等等，偏偏就係德成局長唔聽講，宣布要用四百四十六億申辦亞運，其中一百四十五億係直接成本開支時，仲懶勁咁講咗句：「政府決不搞冇長遠效益嘅華麗工程，東亞運冇出現大白象，主辦亞運亦唔會生出大白象！」

就係呢句「大白象」搞到成單嘢喎咗，據聞該位公關界人士見德成局長都唔聽意見，自把自為搞咗隻「大白象」出嚟已經無眼睇。後尾政府見到坊間對搞亞運劣評如潮，政黨又唔支持，個個淨係記得「大白象」，惟有急急再搵番呢位高手再諗對策，但係覆水難收，德成局長之後雖然改口用番建議嘅回應，亦難以力挽狂瀾。

專家指劈價促銷影響質素

聽聞呢位重量級人物私底下同人講，政府對體育發展由來都無長遠政策，而今次為求得到撥款搞亞運又不斷減價，比起早前廣州搞到咁有聲有色嘅亞運肯定差幾皮，淨係個開幕式都已經做唔到啦，真係唔搞好過搞。

以德成局長自視咁高，今次申請撥款唔失敗就奇。其實佢如果唔聽專業意見，就唔好整色整水搞個委員會話聽取各方意見喇，以嗰位廣告界人士為例，就算肯畀錢人，人哋都未必肯畀意見，今次人哋咁有心免費提供推銷策略，德成局長竟然認為只有自己是對的。官員嘅心態，其實至係輸嘅最大原因！