中環出更：郭少明讚賢妻腳頭好
莎莎國際主席郭少明啱啱打入《福布斯》香港富豪榜，佢好謙虛咁話只係盡力做到最好。受惠個人遊，佢嘅連鎖化妝品零售店近年生意大旺，帶挈佢身家水漲船高，仲打入埋富豪榜，對於白手興家嘅佢嚟講，都算光宗耀祖。
對於今日嘅成功，佢好有風度咁將功勞歸畀太太，話當年都係幫太太手先學到做化妝品生意。佢仲甜絲絲話，太太好旺佢，卅幾年嚟，兩夫妻拍檔打江山，太太帶畀佢唔少好運，創業初期遇上挑戰，但有太太鼓勵，一啲都唔覺得苦。有太太呢粒幸運星照住，郭少明連賽馬都順過人，前排太太幫佢隻愛駒抽檔次，結果捧走國際賽幾百萬獎金。
兩公婆喜外遊換季
除咗工作，佢哋兩夫妻仲有一樣嘢好夾，就係鍾意趁出門時買衫換季，事關佢哋每年都要去歐洲出席美容展，好似啱啱過去嘅星期日佢着住入馬場嗰件紫色Moschino西裝褸，就係喺歐洲買嘅，郭生鍾情呢個牌子剪裁夠貼身，加上香港較少有男裝，所以一睇啱就買，件褸手袖有個和平標誌，相當特別，不過講到價錢，郭生就唔係好記得，事關件褸係幾年前買落，睇嚟郭生今時今日貴為富豪，都一樣唔奢侈浪費。
卓妮