中環出更：梁定宇穩陣派定期存款抗通脹
港紙貶值，要抗通脹，係時間部署新一年賺錢大計，但黃金升幅已巨，樓價升值空間又有限，買乜最保值?東華董事局成員各有投資秘笈，主席梁定宇係穩陣派，放錢喺銀行做定存最安心；副主席陳文綺慧（Viola）就進取啲，計劃喺內地二線城市買樓；賭王千金何超蕸總理係防守派，節儉唔使錢最實際喎。
囝囝朗誦助興牛一
梁定宇（Billy）上周五牛一，喺尖沙咀高級餐廳Harlan's包場開party，近百位東華董事局成員及高層齊到賀，順便慶祝新年。Billy話，廿幾年未試過大排筵席賀生辰，咁高興，捉埋攞咗朗誦比賽冠軍嘅囝囝晉熙solo表演助興。
講到投資部署，Billy就好謙話自己水皮，佢自爆試過炒股，但最終損手離場，寧願穩陣啲，買人仔、做定存。從事藥業生意嘅Viola就鍾情買磚頭，
緊內地二、三線城市嘅筍盤，佢公司已有廠喺南京，遲啲買埋當地樓都未定。
本身做投資生意嘅總理馬陳家歡（Katherine）就睇好人仔長升長有，佢話今年跳上車都未遲，但去年熱爆嘅澳元就咪掂住，因為升幅太驚人。同場仲有前東華主席李三元，佢家族做皮革生意，對皮價波幅好敏銳，去年皮革價格升咗近兩成，幸好佢早着先機儲存唔少貨。但講到理財投資，就交畀理財顧問，費事傷神。
超蕸慳儉嗜好瞓覺
總理何超蕸對錢唔太敏感，但講到照顧賭王，佢就滔滔不絕。社交圈好期待賭王回歸，但超蕸話未有打算，等爸爸安心休養再算。聖誕期間，何家子女輪流唱歌跳舞搞氣氛，氹到賭王笑
。超蕸生於大富之家，原來佢係慳儉一族，最大嗜好原來係瞓覺喎。
卓妮