政情：嫻姐同舊政敵做Friend
政壇上冇永遠嘅朋友，更冇永遠嘅敵人，昔日互相開火嘅「政敵」，今日亦可成為「老友」。工聯會副會長陳婉嫻當年仲做緊立法會議員時，不時同時任公務員事務局局長林煥光駁火。家陣大家都已退落嚟，昔日火花不再，嫻姐尋日更公開大讚林煥光脫下官帽後，講多咗好多真心話，二人更成為老友喎。
曾被喻為「九東票后」嘅嫻姐，○八年起冇做議員後，一直樂於專注做好地區工作，即使黨友勸佢強勢復出佢都唔願。尋日佢出席婦女動力基金嘅活動時，唔單止見到好多婦女界嘅好拍檔，更巧遇平等機會委員會主席林煥光呢位「舊政敵」。嫻姐致辭時仲笑言，喺林煥光冇做官後，先同佢做到老友，事關佢比以前講多咗好多真心說話，又大力批評港府進行假諮詢，聽得佢好鬼開心。
聽到嫻姐咁講，原本坐定定嘅林煥光都打咗個突。佢事後笑言，佢同嫻姐不嬲都咁Friend，同佢做官與否無關喎。