政情：金勞詹唔敢試新「髮」
我哋早前報道過，金融服務界立法會議員詹培忠抵受唔住友人慫恿，接受以細胞技術美容，想塊面回復青春。我哋後來問佢，會唔會順便搞搞頭上嘅煩惱絲？佢話：「我對呢啲嘢從來無信心。」即係唔敢試新「髮」，費事希望愈大，失望愈大。
金勞詹試美容新科技，但乜嘢名堂就講唔出，淨係知塊面畀針拮咗十幾針，用咗三萬元。報道出街後，醫生打電話畀佢，解釋指呢種係德國最近技術，喺人體內抽出血液，以儀器將血液內嘅壞細胞篩走，而剩低嘅好細胞就攞去培植，再注射入人體，可以抗衰老，肌膚回復青春。金勞詹話，乜原理都好啦，最緊要有效，捉到老鼠先至係好貓。
金勞詹敢做白老鼠試嶄新美容科技，有冇諗過以類似科技刺激頭髮，令其回復濃密呢？佢話，幾十歲人，無所謂啦，何況佢對增髮科技一向無信心喎。其實，政府廣告都話，辦法總比困難多，金勞詹又唔使咁灰心嘅。