政情:質詢多籮籮 張建宗勢變箭靶

立法會財委會喺嚟緊嘅星期五審議政府申亞撥款,孭飛嘅民政事務局局長曾德成肯定變炮灰,而喺財委會前兩日召開嘅立法會大會,佢嘅同僚勞工及福利局局長張建宗亦被圍攻。

但凡周三例會有六條口頭質詢同十四條書面質詢,而喺呢二十條質詢當中,關張建宗事嘅就佔四分之一,包括咗三條口頭質詢同兩條書面質詢,係眾局長之冠。

職工盟嘅李卓人率先翻政府舊帳,跟進退休保障模式嘅可持續性。社民連嘅議員就舉出舊年兩宗駭人聽聞隱蔽長者悲劇,質詢張建宗有無檢討現行安老政策。工程界議員何鍾泰就問及機電工程專業人員及技術人員報讀由建造業議會訓練學院舉辦嘅適任技術人員TI課程。保險界議員陳健波就質詢,由僱員再培訓局搞嘅保險業課程,究竟有乜嘢成效。自由黨主席劉健儀就質詢有關涉嫌騙取交通意外傷亡援助金嘅情況。

呢幾瓣既係棘手亦係遲遲未解決嘅社會問題,全部都係民生又貼身,睇嚟張建宗都係要打醒十二分精神,接受議員嘅左右夾攻。

Money18新功能「18好路數」為你預測心水股票升跌機會率