政情：港大百周年巡遊星光熠熠
香港大學名人校友一籮籮，百周年啟動禮場面星光熠熠，一眾政界人士、前任高官都帶埋一家大細出席，其中七三年畢業校友、前財政司司長梁錦松就帶埋國寶級老婆伏明霞、三個仔女到場，阿松仲透露二仔皓嘉已經成功畀直資名校拔萃男書院附屬小學取錄，唔知大個仔會唔會入埋港大呢？阿松話到時先算喎。
港大尋日喺沙灣徑何鴻燊體育中心舉行百周年啟動禮及巡遊，逾四千人出席，阿松嘅三個仔女跟埋一堆小朋友一齊巡遊，媽媽小伏就追住喺旁邊影相，非常興奮。
阿松二仔如願入男拔
阿松、小伏之前為二仔報讀男拔，原來已經收到取錄信，今年九月升小一，阿松話其實有為囝囝報埋聖保羅男女中學附屬小學，結果未知，不過已經一心畀囝囝讀男拔，皆因大女已經讀緊聖保羅男女，佢唔想囝囝讀同一間，怕佢「活在家姐的陰影下」，果然係父母愛子女之心，無微不至。
除咗阿松外，自由黨副主席周梁淑怡（莎姐）同老公周明權都有帶同孫仔孫女出席，三代同堂一齊嚟，莎姐話以前住何東宿舍，大學時代嘅佢就比較文靜，較少參加體育活動，反而走咗去夾大學Band，醉心唱歌。
